ایران اور چھ عالمی طاقتوں کے درمیان مذاکرات 7 اپریل تک ملتوی

(ایجنسیز)

ایران اور چھ عالمی طاقتوں کے نمائندوں نے کہا ہے کہ تہران کے جوہری پروگرام پر جاری مذاکرات کا حالیہ دور سات اپریل تک ملتوی کر دیا گیا ہے۔

فریقین کی جانب سے جاری کیے جانے والے ایک مشترکہ بیان میں مذاکرات کے حالیہ دور کو "بامقصد اور فائدے مند" قرار دیتے ہوئے کہا گیا ہے کہ مذاکرات کار ویانا میں سات اپریل سے دوبارہ بات چیت کریں گے۔

بدھ کو آسٹریا کے دارالحکومت ویانا میں عالمی طاقتوں کی اعلیٰ



مذاکرات کار اور یورپی یونین کی خارجہ پالیسی کی سربراہ کیتھرین ایشٹن نے ایک پریس کانفرنس میں مشترکہ بیان پڑھ کر سنایا۔

بیان میں کہا گیا ہے کہ مذاکرات کے حالیہ دور کے دوران فریقین نے ایران کے یورینیم افزودگی کے منصوبے، ارک کے مقام پر بھاری پانی کے ری ایکٹر کی مجوزہ تعمیر اور ایران کے خلاف عالمی پابندیوں پر بات کی۔

انہوں نے مزید بتایا کہ اس سلسلے میں اپریل میں مذاکرات کا اگلا دور ہو گا اور اس دوران ماہرین کی سطح پر بات چیت جاری رہے گی۔